政壇：政商定格：李梓敬寒風下影結婚相
政壇接連傳出喜訊，除區議會選舉票王劉國勳好事近外，只有二十七歲嘅富貴黨青年團主席Dominic李梓敬亦決定明年十二月同女友拉埋天窗，前晚仲已經影咗第一輯結婚相添！
Dominic話雖然距離婚禮仲有成年，但由於兩公婆打算影四、五輯結婚相咁多，所以依家開始影已經唔算好快o架喇。佢又話未來老婆好希望有個童話式婚禮，明年十二月二號會喺迪士尼筵開三十席，希望可以滿足到老婆嘅夢想。
前晚條街氣溫極低，Dominic同未婚妻喺刺骨嘅寒風下企足五、六個鐘頭，結果搞到病咗，聲都沙晒，但佢笑言只要啲相影得靚、加上有個咁好嘅老婆，即使病都抵喎。
李梓敬（右）前晚喺刺骨寒風下影咗第一輯結婚相。（李梓敬提供）