政壇：搞搞政：阿Ron愛駒再飲恨
行政會議召集人阿Ron夏佳理尋日喺馬場為佢嘅愛駒「紅色禮物」出盡力打氣，因為喺上月嘅墨爾本盃賽中，「紅色禮物」以半個馬鼻之差，輸咗畀法國馬「多利得」，尋日國泰航空國際盃賽第四場，兩匹良駒再度同場較量，阿Ron直言好希望可以一雪前恥，可惜最後對手再次捧盃。
開跑之前，見到阿Ron架住副墨鏡，信心十足。佢話墨爾本盃嗰次，「多利得」本來係由韋紀力策騎，後來臨時換上另一個騎師，仲要贏埋，令佢覺得好唔抵，今次誓要報仇。無奈「多利得」尋日真正由韋紀力上場，依然贏成個馬位跑出，第二係「自由好」，「紅色禮物」同「銀塘勝景」鬥到難分難解，連評判都冇晒符，最後惟有宣布雙季軍。
其實跑第三都算有個交代，都有二百二十萬獎金同「銀塘勝景」瓜分，好過冇啦。
