政壇:煲呔曾不甘寂寞爭曝光

夕陽政府任期剩低幾個月,全城焦點集中喺邊個做到下屆特首,而一向自大嘅煲呔曾,又點忍受到畀全香港冷落吖,近日不斷出嚟爭取曝光。

作為夕陽政府話事人,若果喺民間有意外發生時探傷者本來正常不過,只不過睇番以往例子,即使要探,都甚少會選擇朝早去。理由好簡單,官員探訪,醫院唔多唔少要做準備,醫院一方面要安排、另一方面又要維持運作,既然官員探望都只係表示關心,咁正常梗係等晏啲至落去啦。

消息人士就話,煲呔曾最初其實係打算去晒廣華同伊利沙伯醫院探傷者o架,更加計劃探完傷者後落災場視察救援情況,只不過呢個建議一出,即時引起反響。大佬呀,你落兩間醫院,有關方面就要分神去照顧你,咁唔只令到病人得唔到適切治療,仲會加重醫療系統負擔,總之就百害而無一利。

再者,喺救災工作仲未完成之際,無厘頭走落災場,此舉只會加重前線人員負擔,變相係阻礙救援,根本係不負責任之舉。煲呔曾發神經,好彩佢身邊仲有人算係清醒,逼佢打消呢個念頭。

搬唔郁獎盃傻笑

煲呔曾尋日喺馬場出席活動時又鼓勵選民要踴躍投票,選出新一屆特首選委會,背後理由當然又係啲聽到悶嘅廢話啦,反映佢不甘寂寞,出嚟爭曝光。

其實,煲呔曾入馬場係擔任一個國際盃賽嘅頒獎嘉賓,當馬主未上台時,佢百無聊賴,走去摸吓個獎盃,又試圖想搬起隻獎盃,點知發覺太重搬唔郁於是放棄,旁邊冇人理佢,而佢就自己喺度傻笑,簡直無聊之極。

「Money18免費即秒股票報價網站」現推出8升級功能,財經資訊,實時實發!