減排小打小鬧 停車熄匙添亂

如果有份工唔止要有一眼關七嘅視力、跑步快過汽車嘅體力、畀人狂鬧都唔發火嘅定力，咁嘅工睇怕超人都未必做得掂。

乜嘢工咁難頂？咪就係交通督導員同環保督察咯。講起都係多得環境局局長邱騰華好帶挈，佢整色整水搞出嚟嘅強制停車熄匙法例下周四實施喇，到時佢一定會扮晒「環保英雄」周圍做騷，不過班執法嘅交通督導員及環保督察就慘咯。

佢哋要由朝到晚揸住個秒錶，打雀咁眼周圍望，一（目及）到有人停車，即刻埋去睇吓停車幾耐，有冇熄匙，如果計錯時間抄錯牌，畀司機窒番轉頭事小，分分鐘有人動粗事大。

係嘞，佢哋仲要先搞清楚冇熄匙嗰架係乜嘢車，因為電動車唔屬規管範圍，萬一搞錯咗有排拗。唔好彩嘅，遇到司機脾氣差啲，費盡唇舌解釋都冇用，少啲忍功都唔掂，隨時文鬥變武鬥。

除咗公家路，連私家路都關事o架。如果收到投訴話有人喺私家路違規，一樣要執法。一句講晒，做呢份工要超人上身，眼觀四面，耳聽八方，有三頭六臂都唔掂喇，問你點頂！

話時話嘞，當局罔顧民意，霸王硬上弓立法強制停車熄匙，但條例幾經修補，呢樣豁免，嗰樣網開一面，變咗既繁瑣又複雜嘅「剝光豬」條例，唔湯唔水，不倫不類，駕車人士同執法人員一樣，根本無所適從。

本來呢，既然有法可依，如果有心改善空氣質素嘅，就應該喺執法方面投放足夠資源，點知完全唔係嗰回事。好似培訓獲授權執法嘅交通督導員同環保督察咁，話就話提供執法訓練，原來有關課程流於形式，只講法例條文同執法細則，欠缺「實戰」訓練，根本就係紙上談兵。更離譜嘅係，依家全港交通督導員不足三百人，根本無法應付條例實施後激增嘅額外工作量，當局話就話增加人手，但講出嚟笑死人，原來新增協助執法嘅交通督導員，得十八個咁大把，你話係咪得啖笑吖？

邱騰華一向環保當做騷，根本冇心減排，一味做埋啲細眉細眼、小打小鬧嘅門面工夫，徵收膠袋稅吖，停車熄匙吖，虛應故事，敷衍市民，唔怪得佢愈做騷，香港愈烏煙瘴氣喇。

早排有項國際調查發現，香港空氣質素喺全球五百六十六個城市中排尾八，唔止輸畀新加坡幾條街，連馬尼拉呢類落後城市都不如。計功夫茶話齋，煲呔曾「氣候逃犯」呢頂帽，睇怕一直要戴到夠鐘收工咯！