CULTURE 噏：自助繪畫 Jam出我天地

這次我們找來一位80後Art Jamming發燒友，分享Jam文化。

自助繪畫（Art Jamming）就如Jam 歌，在畫室裏自由創作，深受80後歡迎。有80後更創業開畫室，讓更多人Jam出自己的天地。香港中文大學藝術系教授陳育強認為，Art Jamming的「零限制」創作方式能推動本港藝術文化。

Wallis：近年興玩Art Jamming，去年初就同朋友去玩，點知一試難忘。自助繪畫跟學畫畫不同，唔需要講求技術，只要自己覺得靚就得喇。我本身無畫畫底子，只係想隨心畫，第一次Art Jamming就畫咗一幅麥兜，送畀朋友做生日禮物，朋友收到好開心，我都好有滿足感。

陳：香港有好多年輕人鍾意藝術，但部分怕被人批評而唔敢畫。而Art Jamming係自由創作，由題材到畫畫整個過程，都係自己話事，無任何技巧要求，亦無導師在旁監督，年輕人隨個人風格創作，因而較易獲取成功感。

Wallis：平時畫一幅畫，都花三、四個鐘頭，而且自己一個人畫好悶，而Art Jamming最開心嘅地方，係可以一邊Jam畫，一邊同朋友傾偈，飲品又任飲。平時同朋友出街消遣，離唔開睇戲、唱K、行街，已經玩到好悶，Art Jamming成為我哋嘅另類選擇。加上平時工作忙，好想抖抖氣，Art Jamming係一種好好嘅減壓方法。

陳：Art Jamming流行，與香港社會文化有莫大關係。香港生活節奏急促，都市人壓力大，繪畫可以令人放慢腳步，稍為relax一下。而Art Jamming為參加者提供所有繪畫工具和顏料，非常配合年輕人貪方便嘅即食文化，所以深受歡迎。

Wallis：自己係Art Jamming超級fans，見到身邊愈嚟愈多朋友鍾意玩，覺得有商機，所以今年決定創業，開設自助繪畫畫室。大部分人嚟Art Jamming，都係為咗環境同氣氛，所以我刻意保留窗口，又安排座位之間闊落啲，增加空間感。

陳：香港環境擠迫，缺乏創作空間，畫油畫就需要較大地方，喺屋企未必做到，所以畫室成為都市人另類選擇。呢種另類藝術創作文化，可推動更多年輕一代接觸藝術，對香港整體藝術文化發展有一定好處。

Wallis

80後，熱愛Art Jamming。從事會計多年，今年毅然辭工轉行，首次創業，開設自助繪畫畫室。

陳育強

香港中文大學藝術系教授及藝術文學碩士課程總監。