政壇：搞搞政：蔡素玉萬七蚊奪議席

區議會選舉曲終人散，失敗老手、得勢新人都走出選舉激情呈報選舉開支，選舉開支上限係五萬三千八百元，早前我哋講過有人使盡未得議席，今日又見有人一毫子都無用過便當選，好多使得少嘅當選人都係自動當選，建仔嘅蔡素玉雖然使咗一萬七千三百七十四蚊，但係筆錢多用於分擔黨內巨額廣告開支，否則，睇嚟佢都可以千千聲當選喇。

之前我哋講過，有候選人花咗五萬幾蚊換來七十七票，每票成本高達六百幾蚊。元朗屏山北嘅鄧慶業自動當選，所以一毫子都無用過；同區廈村嘅鄧家良、錦田嘅鄧卓然亦都只係用三十蚊嚟影咗疊個人相。另外，黃大仙龍趣選區嘅黃金池同翠竹及鵬程選區嘅蘇錫堅亦都只係用咗三百幾蚊，主要係用嚟印製多謝選民支持嘅海報。同樣係自動當選，蔡素玉花咗萬七蚊，維園選區嘅周潔冰亦用咗萬四蚊。

喺尖沙咀東選區參選，外號加利仔嘅Ahuja Monesh Gopaldas，雖然佢攞到不足五百票落敗，但佢只係用咗六十五蚊，平均每票成本毫幾子，名副其實刀仔鋸大樹。