政壇：唐唐出醜200蚊買打蛋撻

工展會喺高通脹下揭幕，小市民爭相入場搶平貨，兩位特首選舉參選人梁振英（CY）同唐英年（唐唐）都有去做騷，出身富貴嘅唐唐仲入場消費，感受吓小市民嘅呼吸，點知一出手又出事，事關佢買一打蛋撻，但隨手一畀就係兩張「紅衫魚」，搞到職員呆一呆，惟有接過兩張一百蚊，再找番一百四十蚊畀佢。

蛋撻幾多錢一個？答案係五蚊一個，一打六十蚊。不過，唐唐明顯唔知價，埋到蛋撻舖就直接柯打一打蛋撻，然後好爽快咁攞出兩張紅衫魚，仲猛叫負責人唔可以平賣畀佢喎。唐唐食撻唔知價，可能因為平時食開啲貴價蛋撻，唔知道基層小市民嘅生活用度啩。

其實，尋日唐唐出席完工展會開幕後想急急離開，根本冇打算參觀任何攤位，但其中一檔賣鉸剪嘅攤位為咗吸引唐唐，一早就安排二十幾個職員企定定向佢打招呼，唐唐於是笑笑口行埋去同啲職員合照，似足拉票造勢咁款。搞工展會嘅廠商會據傳係唐唐票倉，CY尋日喺場內一陣就急急腳快閃。至於等收工嘅煲呔曾，尋日就一如往年拖埋老婆去工展會掃貨，仲大手筆使咗二千幾蚊買嘢。