政壇：張震遠葉劉講心

政治有幾現實？疑似特首選舉可以一窺。梁振英（CY）陣營大將張震遠暫停市建局主席嘅工作，瞓身幫CY，但佢尋日出席匯賢智庫一個活動時，又對同樣被視為疑似特首參選人之一嘅葉劉淑儀示好，高調表示仰慕葉太，冧到葉太甜絲絲，即刻投桃報李話同樣仰慕對方。佢哋公然互訴衷情，但就絕口不談葉太參選特首一事，好似約定咁。唔通談談情、戴高帽冇所謂，政治支持就無謂多講？

張震遠尋日出席新民黨主席葉劉淑儀搞嘅匯賢智庫學苑活動，演講香港市區重建，佢話，雖然佢暫停咗職務，但因一直好仰慕葉太，所以葉太開到聲唔會托手（月爭），仲話尋日係以「仰慕葉劉淑儀嘅香港人」身份出席。葉太一聽，即刻好識做咁話，其實佢都好仰慕張震遠。

佢哋因乜嘢互相仰慕呢？張震遠話覺得葉太係有能力嘅人喎。葉太就回禮話，祖籍山東嘅張震遠係典型山東人性格，為人坦率，而且演講準備充足，兩個人互笠高帽，對答真係令人幾難頂。

參選要睇選委結果

不過，口講仰慕葉太嘅張震遠擺明車馬撐梁振英，對同樣有所動作嘅葉太卻口惠而實不至，唔通已經睇死葉太參選機會極微﹖葉太尋日都話，佢下個禮拜先決定會否參選，因為要分析選委選舉結果，睇吓可唔可以攞夠一百五十張提名票。

講完呢筆，另一個搞咗參選特首大會嘅馮檢基都透露預咗十五萬元經費參加泛民初選，阿基解釋，呢筆錢主要來自大學同學、選舉顧問團同中小企負責人。十五萬元對其他參選人嚟講當然係小事啦，但對以基層工作為主嘅民協並唔係小數目。阿基勝出機會微，難怪有人話呢十五萬元真係凍過水，甚至係倒錢落鹹水海。