樓上竇三不管 懶官僚真靠害

花園街排檔奪命大火震撼全港，港府上下隨即變晒救火隊，又話監管排檔，又話嚴控劏房，整色整水，無非都係為防民怨大火燒到埋身啫。其實，早知今日，何必當初，如果當局平時做好防範措施，盡早拆除都市炸彈，火災慘劇就唔會爆完一單又一單喇，叮！

嗱，講到都市炸彈，何止排檔及劏房，近年開到成行成市嘅「樓上竇」一樣危機四伏。所謂樓上竇，即係開喺市區商廈上嘅酒吧、的士高同卡拉OK之類嘅夜店，由於呢類新興「八、九十後」聚腳私竇欠缺監管，唔少烏煙瘴氣，淪為罪惡溫床，甚至成為安全隱患，危機處處，真係好牙煙o架！

樓上竇有幾牙煙？若然大家係宅男剩女或者深閨一族，睇睇本報記者嘅直擊報道就一清二楚嘞。呢，華燈初上，樓上竇已經逼滿潮男索女，狂歡達旦過後，醉娃酒鬼更加一街都係，有啲神志不清，有啲就由樓上揈頭揈到落街，佢哋究竟喺樓上竇做咗乜嘢事，畫公仔唔使畫出腸喇。

樓上竇烏煙瘴氣，固然令人側目，不過更得人驚嘅係消防安全問題。有資深工程師警告，商廈原本只用作辦公室用途，改為酒吧食肆後人流大增，一旦起火，消防通道能否負荷，頓成疑問。唔係危言聳聽，記者巡查發現，本來日間乾淨企理嘅商廈後樓梯，入夜後面目全非，堆滿煙頭同紙皮，防煙門又被大型垃圾桶阻塞，萬一發生火警，花園街住客逃生無門嘅慘劇隨時重演。

政務司司長林瑞麟同食衞局局長周一嶽喺花園街大火慘劇後急急出嚟做騷，但係樓上竇危機四伏，反而闊佬懶理，關人個關。正如區議員話齋，警方應該加強巡查，食環署發牌要嚴格把關，食衞局更應該檢討發牌制度，杜絕違規商人靠害市民。依家樓上竇成為三不管，都市炸彈遍地開花，唔通港府又要等到搞出人命先至肯做嘢？

嗱，咪話太一叮唔提醒，港府若然巡查樓上竇，唔該檢查埋樓宇結構，事關據資深工程師講，樓上竇如果為慳地方，私拆主力牆柱，就會直接損害樓宇結構，隨時出事。無人想喪蒲變喪命，各位高官唔該快快跟進，清除隱患，唔好餐餐都要等到死人冧樓先至嚟補鑊，叮！