政壇：煲呔曾迷信金融泡沫
世界金融泡沫自從○八年畀金融海嘯篤破後，歐美等國都講緊減少製造金融泡沫，但偏偏煲呔曾要同世界脫軌。
煲呔曾尋日喺一個經濟峰會上，先話香港要發展六大產業，跟住就露出心底嗰句，話香港要繼續大搞金融業，因為其他產業都好難向高增值發展。講到最尾，佢仲直斥有種講法認為香港應該平衡發展產業係「不合時宜」，事關唔係樣樣行業都啱高增值，而金融業仍有好大市場，因為香港背靠祖國，內地城市化每提高一個百分點，就多咗千幾萬城市人口，呢啲新增人口，全部都係目標市場。如此醉生夢死迷信金融泡沫，好彩佢任期好快就完啫。