政壇：發叔擁抱林鄭

新界鄉議局主席劉皇發同發展局局長林鄭月娥早前嗌晒大交，發叔狠批發展局對新界村屋僭建問題出爾反爾，旗下鄉民更火燒「林門鄭氏」嘅紙棺材同紙紮公仔洩憤，林鄭就堅持強硬執法，仲反寸發叔政治手腕高強，有能力搞掂班鄉民。做咗場大龍鳳後，呢對冤家近日疑似化敵為友，聯手封殺泛民主派借政府山問題做文章，再次證明喺政治上係冇永遠嘅敵人！

發展局決定拆卸重建政府總部西座，用嚟起寫字樓加商場，引起環保團體同部分政黨不滿，仲發起連串保育政府山嘅行動，要求保留西座。雖然政府計劃減少商場比例，但部分泛民繼續唔收貨，要求由發叔做主席嘅立法會發展事務委員會就新建議召開公聽會，希望借啲環團同專家意見，逼林鄭收回成命。

明年四月又鬥撼？

尋日發叔透過秘書處向議員發出通告，話諮詢過全體委員意見後，共有十一名議員認為毋須召開公聽會，三人冇意見，得八人認為有需要，所以決定順從民意唔開會，間接幫咗林鄭一把。發叔早前曾就火燒紙公仔事件致電林鄭疑似耍冧，唔知呢份係咪用嚟道歉嘅禮物呢？

雖然發叔同林鄭喺政府總部西座嘅問題疑似化敵為友，之不過，林鄭日前實牙實齒咁話喺明年四月會鐵腕處理新界村屋僭建問題，肯定又辣慶班鄉紳，畀班鄉紳鬧軟弱嘅發叔到時會唔會硬起來，又再同林鄭化友為敵鬥撼呢？大家不妨拭目以待。