失智症支援無門 懶官僚自絕後路

失智症又名老人癡呆症，顧名思義，老人家患上後會逐漸喪失記憶同思考能力。好似有患者曾經誤將長袖衫當長褲着，因為患者認為有兩條管嘅就係長褲。

講起上嚟，港府愈睇愈似一名失智症患者，事關見到兩條管就當長褲呢種反映思考能力退化嘅病徵，一樣出現喺港府身上o架。嗱，全港失智症照顧者聯盟係咁講嘅，政府一直對失智症患者及其家屬零支援，其中最顯著嘅莫過於全港都冇一間由政府資助、正式服務失智症患者嘅日間中心。

大家可能會問，港府多錢到可以傻更更向海外港人派錢四十億，點解成立一間服務中心都唔做呢？咪因為見到兩條管就當長褲囉，失智症患者絕大多數都係七老八十嘅老人家吖嘛，於是唔理三七廿一，全部趕晒去長者中心就算數！

喂，衫還衫，褲還褲，失智症患者嘅自理能力明顯比一般老人家更差，更需專業照顧。港府不分青紅皂白，令失智症長者失去適切照顧，官老爺究竟係智力衰退吖，定係心腸愈嚟愈冷？打個比喻，如果閣下不幸遇上車禍，血流披面，而護士小姐只係肯畀塊藥水膠布你止血，你都一定會鬧爆佢冷血啦，吓話？

聯盟批評，港府對失智症患者闊佬懶理，即係將照顧責任卸晒畀患者家屬，令患者家屬身心俱疲，經濟負擔百上加斤。港府必須檢討政策，好似設置失智症日間中心，同埋為家屬提供經濟津貼咁。

計太一叮話齋，官老爺真係要好好考慮吓聯盟嘅建議。按推算，香港到二○三六年，失智症患者將由現時超過十萬名增至二十九萬，為人為己，官老爺係咪好應該開始善待失智症患者先？

講開又講，如果港府真係良心發現嘅話，咁就唔該送佛送到西，順手增加埋安老宿位啦。大家知啦，港府唔止對失智症長者闊佬懶理，對一班公公婆婆更加視為大包袱，安老政策無法令老人家安心，年年都有無數長者等唔到宿位就已經辭世。老人家等候入住宿位要鬥長命，呢個唔通就係香港人平均壽命特別高嘅原因？

即係咁，若然官老爺仲有少少思考能力，更加應該懂得痛改前非。雖則高官有得食長俸，但世事難料，萬一閣下癡呆病情惡化，同樣需要適切嘅照顧呀嘛，叮！