政壇：搞搞政：譚志源平安夜放火燒身

區議會選舉後隨即爆出種票風暴，燒到政制及內地事務局同選舉事務處身上。種票火頭未熄，另一火頭又燃起，據聞政府打算喺本月二十四號平安夜公布新一屆區議會委任名單。

新一屆區議會委任議席數目，雖然由原來一百零二個削減三分一至六十八個，但泛民主派一直主張要將委任制一刀切，若果委任名單有乜差池，甚或政府喺泛民佔優嘅區議會安插較多委任議席畀建制派，從而主導有關區會控制權嘅話，肯定會被鬧爆。

近年政府每逢公布重要消息，都會儲埋一齊逼埋喺禮拜五或假期前夕公布，目的係等傳媒疲於奔命無暇兼顧，鬧少啲政府，而區會委任名單喺平安夜公布，只不過係重施故技，諗住以接連幾日聖誕節假期做緩衝，唔會畀人鬧得咁甘。

之不過，泛民喺區會大敗後，打擊種票不遺餘力，若果委任制再助長建制派喺各區會嘅實力，泛民必定群起而攻之，睇怕政制及內地事務局局長譚志源喺呢個平安夜一啲都唔平安。