政壇：KK要搲提名

距離出年立法會選舉唔夠一年，各黨派已密鑼緊鼓諗計部署參選事宜，而新增嘅五個超級區議會議席之戰，肯定成為全城焦點，之不過要派人落場都唔容易o架，事關單係提名門檻就足以令唔少黨派煩惱。

泛民特首初選勝算微

超級區議會議席嘅提名門檻要十五位民選區議員，按牌面上睇，民協可以不求人，絕對有能力送自己人入閘，但係最近有政界中人睇清楚相關規矩之後發現，落場參選嘅人，其實係唔可以提名自己。換句話講，得十五個區議員嘅民協想搵人落場嘅話，至少有一個提名要假手於人。

雖然要向外挖一個提名，唔係乜嘢登天難事，但一來咁樣就冇咁馨香，二來萬一有乜嘢意外起嚟，民協自己友之中有一個畀唔到提名嘅話，民協就又要開口問人，咁樣就麻煩好多囉。老實講，民協本來嘅如意算盤，就係由立法會議員KK馮檢基轉戰超級區會，譚國僑就循九龍西直選上位，即使要向外求提名，相信都無礙KK落場，但依家譚國僑喺區選敗陣，人氣同勢頭大減，再由佢去直選可能冇咁好睇。

KK尋日話仲未開始諗出年超級區會議席嘅部署，目前主要將精力放喺特首選戰先，所以將來嘅事將來先算，之後仲廣發新聞稿通知傳媒，今個禮拜四佢就會正式宣布參選特首。其實唔單止KK做到特首嘅機會係零，連佢喺泛民主派嘅特首初選中跑出嘅機會都係微乎其微，佢咁專注搞特首選戰，相信都係為咗出年立法會選舉啫，既然係咁，不如快啲諗好點部署立法會選舉先啦！