人逢佳節倍心噏 這個冬天特別冷

人逢佳節倍心噏。聖誕新年旺季又到，但市民消費意欲認真麻麻，無計啦，外圍環境惡劣，加上通脹高企，百物騰貴，惟有節衣縮食過聖誕，勒緊褲頭迎新年囉。

一項最新調查發現，今年聖誕市民平均消費將比舊年大幅減少兩成，人均使費大約兩千蚊多啲，係○八年以來首次回落。消費謹慎原因一字咁淺，歐美經濟前景堪虞，港人對未來冇晒信心，超過四成受訪者唔睇好明年經濟。經濟滿布陰霾，心情自然唔靚，港人開心指數亦插水，由舊年近七成二，跌到得番六成九，你話係咪心噏吖。

○八年金融海嘯橫掃全球，香港首當其衝，當年慘況記憶猶新。港府成日吹水話經濟已經復甦，原來繁榮只不過係假象咋，基層市民根本唔覺得經濟環境改善咗，更無緣分享到經濟繁榮成果。

不過咁，有人快樂有人愁，基層市民要（目及）住荷包過日子，慳得就慳，但中產家庭消費金額預料會上升，走中高檔路線嘅商舖今個旺季撐得住喎。好明顯，貧富懸殊並非當局所講已開始緩和，而係更加惡化。

太一叮唔係靠估o架，日前有項調查顯示，四分三港人認為目前貧富懸殊問題嚴重。按照調查機構推算，全港入不敷支嘅人超過一百萬，都咪話唔得人驚！

基層市民生活好似王小二過年咁，一年不如一年，弊在港府高官闊佬懶理，關人個關。呢嗱，財政司司長曾俊華預算案年年估錯數不以為恥，今年又衰多一鑊，隨時由百幾億赤字，變成三百億盈餘。庫房水浸，官富民貧，港府本應還富於民，幫助飽受通脹之苦嘅基層市民渡過難關。點知鬍鬚曾呢個孤寒財主一早閂定後門，又玩起狼來了把戲，一時話外圍經濟未明朗，一時又話要量入為出，講白啲，即係貴客自理咯，叮！

本港十月份通脹率係百分之五點八，雖然同九月份持平，但食品、衣履、住屋、交通呢啲對民生影響最大嘅消費，升幅全部高於平均通脹率。鬍鬚曾居然罔顧事實出口術，話「通脹年底見頂」喎。話到尾，都係想推卸扶貧紓困責任啫！

聖誕新年本應普天同慶，家陣好多人唔敢消費，就算消費都要睇住荷包，慳得就慳，正如有人話齋，這個冬天特別冷。唉，遇着個漠視民間疾苦、孤寒成性嘅特衰政府，唔使等寒流襲港，市民個心早就凍過冰喇，叮！