CULTURE噏：韓風繼續吹

這次我們找來80後「哈韓族」Joseph，分享他與韓國之間的情緣。

「韓流」襲港！韓國文化近年在港大受歡迎，除大批擁躉追看當地劇集及電影，還吸引不少80後研習韓文，藉以了解當地傳統及歷史，成為「哈韓族」。浸會大學社會工作系副教授趙雨龍指，韓國的流行文化，富創意及多元，對本港青少年極具吸引力，而深入認識異國風情，亦有助擴闊視野。

Joseph：因為我家人嘅工作需要，經常接待來港嘅韓國人，所以自小就經常接觸韓國人，覺得佢哋性格直率、勤力及有禮貌，令我對韓國產生好感；再加上喺○五年收看《大長今》劇集後，我對韓國文化產生濃厚興趣，開始研習其文化、學韓文，並考獲韓語能力考試第六級（該考試最高級別）。

趙：與鄰近地區相比，韓國的流行文化具備較高創意及多樣性。以劇集為例，涉及的題材廣泛，包括家庭、愛情、歷史及懸疑等，吸引不同年紀及階層嘅觀眾收看。而劇集嘅場景、物件，甚至歷史事件，都可能激起觀眾對鑽研當地文化嘅興趣。

Joseph：當我了解韓國文化後，就更加着迷！我對當地音樂、電影、電視劇等流行文化，以及歷史、傳統，通通感興趣。現時，我用嘅日用品及電子產品，都係韓國品牌；一有時間，我就會到韓國不同城市旅行，親身感受當地文化。

趙：韓國及香港同樣位處亞洲，位置相近，喺風俗、衣着及流行文化等各方面都有相似之處，港人較易接受當地文化。另外，科技進步，港人容易上網搜尋韓國資訊，亦都係香港刮起「韓風」嘅原因。

Joseph：學習韓文，認識韓國文化，對我嘅人生影響好大。通曉韓文成為我求職時的優勢，我畢業後做嘅每一份工，都同韓文有關。除咗依家擔任韓語統籌外，我亦曾經喺機場免稅店擔任韓國大使。更重要嘅係我喺韓國人身上感受到一份真摯、誠懇，同香港人嘅冷漠有好大對比，所以我希望努力推廣韓國文化，令更多港人認識到呢個友善毗鄰。

趙：好多80或90後想尋找個人身份，佢哋透過學習新事物，特別係比較少人認識嘅非主流文化，有助確立自己身份，肯定自我。年輕人研習異國文化，亦可擴闊眼界。