政壇：玩具大王「升呢」地產大王
旭日國際主席蔡志明向有「玩具大王」之稱，近年佢嘅生意愈嚟愈廣，仲因為大舉進軍房地產，買入唔少貴重物業，身家亦水漲船高，譬如尖沙咀安達中心及KCP九龍城廣場兩幢物業，市場人士估計現時市值高達三十億元以上，唔怪得商界口痕友都話，蔡志明再唔係玩具大王，應改叫「地產大王」就真。
地產業務咁理想，蔡家上下梗係開心，負責打理集團地產業務嘅蔡志明細女蔡加怡話，爸爸嘅眼光真係好犀利。
加怡嘅細佬蔡加讚就好鬼馬，笑稱家姐係「地產女王」添！不過，蔡志明都話，近年佢都投資十五億元喺韶關擴建廠房，每年生產嘅玩具產量高達四十億件，廠房無論以規模、產量計算仍然稱霸全球，言談間對發迹嘅玩具業仍然十分重視。
蔡志明近年大手筆投資地產，但對「玩具大王」稱號仍不忘情。