政壇：陳國民養生靠晒五青汁
現代人講究養生之道，家電生意愈做愈風生水起嘅德國寶集團董事長陳國民（Edward）就有獨特嘅秘方，佢話日日都會喺公司用自家攪拌機炮製五青汁嚟飲，仲會與同事分甘同味添。五青汁係由西芹、青蘋果、青瓜、青椒及苦瓜五種蔬果混合嘅果汁，坊間流傳對二十幾種疾病有神奇功效，包括降低膽固醇、血糖、失眠甚至癌症等。
Edward除咗埋首生意外，仲親自拍廣告做產品代言人，講到公司產品時，佢透露，當年奠定公司市場地位嘅熱水爐至今依然熱賣。不過，Edward都冇偷懶，見到市場有新需求就及時推出新產品，近排佢哋嘅光波爐及自然養生機（攪拌機）就勁受歡迎，其中養生機以極速摩打將蔬果連皮同核都打得極幼細，一齊飲落肚至啱現代人追求健康嘅要求。