政壇:掟嘢三人組等住受綁

立法會掟嘢三人組係令好多建制派議員頭疼嘅人物,不時有人動腦筋點樣可令長毛梁國雄、大舊陳偉業同黃毓民生性啲,早前舉行建制派立法會議員每月例行飯局,有人就建議乘勝追擊,重提修改立法會《議事規則》,杜絕粗暴議會文化,如果成事,掟嘢三人組難免受綁。

區議會選舉之後,公民黨、民主黨同民協等「溫和」民主派,紛紛聲言要同社民連及人民力量割席,建制派議員靈機一觸,商討進一步收緊《議事規則》,授權主席除可出紅牌趕議員出場外,仲可罰重犯嘅議員停賽,暫時唔准佢哋開會,過去因泛民主流派未必支持,但家吓佢哋鬧翻,態度會唔會逆轉呢?無論點,建制派都可藉此測試吓班溫和泛民係咪真係已同暴力政治派系割裂。

今屆立法會仲有大半年先結束,要想趕絕議事堂內掟蕉、掟蛋、掟樽、掃枱、爆粗、放氣球等等,束縛掟嘢三人組先係治標方法,之不過想改《議事規則》唔係咁簡單,首先要喺立法會議事規則委員會傾咗先,之後拎上立法會大會投票表決,仲要經分組點票。絕唔係建制派議員坐埋吹水、幻想吓就搞得掂。

「Money18免費即秒股票報價網站」現推出8升級功能,財經資訊,實時實發!

設計圖片