政壇：鍾庭耀急劃清界線

城中熱話疑似特首參選人，一向靠炒作議題食胡嘅泛民主派搵唔到着力點，尋日孤注一擲搞個所謂泛民特首候選人初選機制嘅異物出嚟，美其名係搵個所有泛民支持者都接受嘅人出嚟同「雙英」鬥，但卻引起變相又搞公投嘅疑團。協助搞初選機制嘅港大民意研究計劃總監鍾庭耀尋日趁泛民公布細節前，急急喺電台澄清，初選機制同「公投」無關，佢係驚公投嘅政治標籤，定係對十幾年前嘅民調惹起嘅政治施壓風波，仲猶有餘悸呢﹖

11年前民調惹風波

鍾博士尋日出席電台節目時以寫信形式解釋初選機制，佢話初選機制雖然有公民投票嘅意味，但並非一般人所講嘅「公投」；而且民間所搞嘅全民投票並無約束力，亦冇正規投票咁嚴謹，頂多只可以作參考之用喎。

初選唔等於公投，鍾博士旨在劃清界線，不過泛民今次搞初選嘅實質意義欠奉，基本上純粹自娛，對大局冇影響之餘，亦唔見得可以影響到任何最終可以當選到嘅參選人，而且去年公民黨同社民連搞完所謂嘅「五區公投」後，社會輿論反響好差，鍾博士早早撇清關係，都係唔想引火燒身啫。

不過，鍾博士搞嘅民意研究過去都多次惹火，十一年前，佢所做嘅民調就曾惹起董建華不滿，結果搞到滿城風雨，亦直接導致當年嘅港大校長鄭耀宗同副校長黃紹倫落台；選舉日做嘅票站調查亦曾經惹來參選人不滿，今次睇怕都有後話。點都好，泛民今次嘅所謂「初選」，鍾博士唔怕講明：「我們要去爭取在整個特首選舉過程中的發言權，就算屬於少數，都要發揮『關鍵少數』的作用。」咁咪即係博話事權？