豬瘟變種來勢洶 豬頭官僚咪放鬆

豬出沒注意！

嗱嗱嗱，唐英年千祈咪自作聰明對號入座呀。雖然閣下被人笑係豬，又蠢又懶嘅豬頭形象深入民心，但此豬不同彼豬，太一叮講緊嘅係新型H3N2豬流感，叮！

呢隻變種豬流感正喺美國作惡，七月至今已出現十宗病例，反映疫情持續擴散。更得人驚嘅係最新三宗確診個案全部係兒童，三人曾經互相接觸，但無接觸豬隻。即係話，新病毒可以人傳人，對人類嘅威脅不斷升級。

兩年前，一場豬流感搞到全世界雞毛鴨血，依家新豬流感大有捲土重來之勢。國際衞生組織唔敢掉以輕心，透露正加速準備應對計劃，以防一旦疫情失控，全球發豬瘟嘅驚心一幕再次上演。

病毒無疆界，太一叮匯報美國最新疫情，就係想提醒大家，新豬流感來勢洶洶，大家一樣唔可以掉以輕心。當然，太一叮最想一棍扑醒嘅人，梗係班衞生官僚啦。事關佢哋負責防疫把關，責任重大，萬一有乜甩漏，搞到香港再病毒橫流，咁就大鑊嘞！

嗱，擔心港府防疫不力，絕非杞人憂天o架。大家知啦，港產官僚對防疫把關一向笨手笨腳，沙士、禽流感、豬流感同手足口病，有邊次唔係搞到一鑊泡？前車可鑑，萬一新豬流感真係衝出美國，香港會唔會成為第一個防疫戰線失守嘅地方o架？港府冇面事小，市民健康受威脅事大！

話時話，港府對防範傳染病毒襲港一向缺乏免疫力，除咗餐餐把關失職之外，內部抗疫嘅能力亦好成問題。其他唔講，就講公立醫院醫生護士不斷流失，人手得七個蓋冚十個樽，問題遲遲未解決，如果新型豬流感真係殺到，唔通要病人自己同自己打針咩？

即係咁，豬頭特首候選人來自港府，所謂物以類聚，太一叮有理由相信，同佢共事嘅食物及衞生局局長周一嶽都係人頭豬腦，所以先至搞到香港好似冇掩雞籠咁，次次畀病毒長驅直入，一發不可收拾。所以話，蠢人若然當選特首，呢個係香港嘅不幸，由渾渾噩噩嘅豬頭官僚負責衞生防疫，更加係香港嘅悲哀！

一句講晒，豬瘟變種來勢洶，豬頭官僚咪放鬆，如果香港被新豬流感攻破，小心被市民炳到變豬頭，叮！