SUN世代：廚少爺再戰「星」途

人人以為少爺一定喜歡吃喝玩樂，但鄭相賢（Tony）這位少爺，絕對可以推翻這個理論。他為理想拋下身段，入廚房拜名師學藝，日日煮足十幾粒鐘，最後憑努力開設意大利餐廳The Drawing Room及星馬餐廳「海南少爺」，兩年間不斷擴大飲食王國。現時這位少爺決意挑戰難度，助「海南少爺」奪得米芝蓮星級榮譽，為摘「星」之旅展開一場新革命。

Tony的爺爺從事銅鋼生意，三叔公鄭翼之更是鋼鐵大王，偏偏這少爺卻愛入廚。十歲負笈英倫，因飯堂膳食難食，他不時下廚款待同學，自此愛上煮食。他十四歲時參考名廚Jamie Oliver的食譜初試煮燒雞，極獲好評：「當時氣氛好Warm，個個都好開心，覺得食物可以傳遞快樂，維繫朋友感情。」

投身銀行 搵第一桶金

初時Tony只當下廚為興趣，直至考進英國倫敦大學經濟系後，才發現原來已離不開廚藝：「大學三年級我去咗藍帶廚藝學院學藝，豐富烹飪知識。」畢業後，他自知廚藝未到家，加上對經營飲食生意未充分了解兼無本錢，他選擇以曲線達成開餐廳的夢想。他一方面投身會計師樓及投資銀行，吸取會計及風險管理知識，一方面努力搵錢。縱在投資銀行「錢」途無限，但Tony並不開心：「我鍾意入廚，逢放假都會入廚練習！」

經過三年的磨練，他自覺儲好足夠的營商及理財心得，又搵到第一桶金，在家人及朋友的鼓勵下，毅然到意大利羅馬拜名師Roland Schuller學藝，為開餐廳做準備：「去意大利令我大開眼界，Roland對食物好認真，我跟住佢，廚藝都大大提升！不過，真係好辛苦，得三個人，由清潔、落單、下廚、焗麵包都一腳踢！日日做足十六個鐘，做得唔好又會畀師傅鬧。」

速奪米芝蓮一星榮譽

學滿師，Tony於○九年開設意大利餐廳The Drawing Room，並邀得師傅Roland助陣，餐廳開業不足七個月便奪米芝蓮一星榮譽，「米芝蓮有個準則要開張一年先會有星，但我哋只係開咗七個月！」一年後，他再開設星馬餐廳「海南少爺」。

為了帶來最正宗的口味，他特意飛往新加坡拜師偷師，食勻當地海南雞飯，更特別聘請當地大廚來港。開業初期大排長龍，但未到半年即有危機，要求極高的他不滿廚房班底對食物沒有要求，與大廚不歡而散。痛定思痛後，Tony親自接手廚房，展開六個月改革：「我要親自做好出品，重新塑造品牌，挽回客人信心！」幾經奮鬥，終於邁向成功。Tony說：「我希望將大眾化嘅『海南少爺』變成米芝蓮餐廳，希望明年今日可以做到。」

Tony's Profile

現職： 海南少爺董事總經理、The Drawing Room董事總經理

學歷： 英國倫敦大學經濟系學士

興趣： 煮食、踢波、高爾夫球、泰拳