政壇：搞搞政：施榮懷工展會派錢濟貧
話咁快工展會又嚟喇！今年除咗展品多，仲派愛心添！候任廠商會長Irons施榮懷話，會方將拎出三百萬元，向六千個單親家庭派五百蚊現金，等佢哋入場買心頭好。換言之，係另類送暖喇！
今屆工展會將於十二月十日喺維園舉行。百物騰貴，但唔少參展商依舊平賣益街坊，實行抗通脹。呢次派錢，將會同東華及香港提升快樂指數基金等機構，甄選合資格低收入單親家庭，等佢哋有個開心聖誕。Irons仲話五百蚊點用並冇限制，買麵、買油、買海味，乜都得，屆時將會有社工陪同shopping，確保筆錢唔會畀人濫用。
廠商會又大力開拓中國內銷市場，明年四月將首次喺武漢搞工展會，部分港產品牌好受內地人歡迎，同胞聽見有工展會，帶定大皮篋等掃貨。
（設計圖片）