領匯六年狂掠水 社會責任得把嘴

六年時間話長唔長，話短唔短，啱啱好由小學一年級讀到小學畢業。呢，領匯上市話咁快就六年啦，算唔算小學畢業呢？

話說領匯紀念上市六周年，冠蓋雲集，但監察組織就踩上門「贈興」，狠批領匯無良，扼殺小商戶生存空間，真係大殺風景。講真，呢六年來，領匯有口皆悲，留畀港人尤其係基層市民嘅最深刻印象，只有兩個字：無良。

作為擁有最多商場面積嘅上市公司，領匯幾乎年年賺到盆滿缽滿，正式係肥到着唔到襪。弊在佢哋對社會責任一啲都領會唔到，唯利是圖，殺雞取卵，淪為無良企業，成為市民眼中貪得無厭嘅吸血巨無霸。

六年來，領匯巧立名目，以各種理由大幅加租，將小商戶趕盡殺絕，搞到怨聲載道，爭拗不斷。嗱，屯門兩個屋邨商場嘅翻新項目，名就好聽喇，叫「商場及街市優化計劃」，查實係乘機趕絕小商戶，叫「搵笨計劃」至啱。工程完成後，商場可能靚咗，不過租金仲「靚」吖，商戶即使可以續租，租金亦大幅上調，增幅最大嘅居然去到七成，問你怕未。

今時今日小商戶經營困難，只能靠薄利多銷，試問有幾多個商戶可以負擔到租金七成升幅吖？領匯擺明要逼走小商戶啫，叮！

話時話吖，羊毛出在羊身上，領匯瘋狂加租，逼走專做街坊生意嘅小商戶，商場同街市貨品肯定大幅加價，到頭來受影響嘅一定係基層市民。早排有勞工團體調查發現，本地整體食材價格不斷飆升，部分地區升幅更加超過兩成，領匯轄下街市租金昂貴，檔戶被迫加價，係通脹不斷惡化主因之一。

除咗加租迫遷搞到商戶冇啖好食，領匯管理同樣乏善可陳。舉個例，為咗增加舖位數目，領匯不惜犧牲商場公眾空間，搞到通道愈來愈窄，唔止令市民不便，更成為安全隱患。

同樣離譜嘅係，領匯早排為咗賺錢竟然出爾反爾，違背「傷健共融」嘅承諾，突然停止旗下逾百停車場為接載傷殘親屬駕駛者提供嘅半價租用車位等優惠。名為物盡其用，其實係利欲熏心賺到盡至真！

港府為推卸管理不善嘅責任，當初將大部分公屋及居屋商場及停車場交畀領匯管理，分拆上市，六年過去，呢個怪胎已經變成魚肉市民嘅哥斯拉，如何降伏呢隻無王管嘅巨型怪獸，唔該當局快快諗計拆掂佢，否則盞官逼民反嘅咋，叮！