CULTURE噏：美少女談情攝愛

這次我們找來一位90後女攝影發燒友Caya，分享「攝影feel」。

愈來愈多80、90後少女鍾愛攝影，部分更非用傻瓜機，而是手持單鏡反光機，游走街頭談情攝愛，拍攝snap shot或人像，藉以表達自我情感。有專業女攝影師表示，由於單鏡反光機日漸普及，款色多、易操作、機身輕巧、價錢便宜，故吸引大批少女購買。

Caya：攝影最吸引嘅地方，係可以捕捉稍縱即逝嘅景象。我喺三、四年前開始影相，嗰陣時只係用手機同傻瓜機，拍攝身邊嘅人和事，及後被朋友稱讚啲相片影得幾靚，令我好想「認認真真」咁去影相，所以喺兩年前，就買咗第一部單鏡反光機。

Eunice：以前嘅攝影愛好者，以男性為主，但近年愈嚟愈多女士鍾意影相，原因係相機普及，單鏡反光相機唔再係男士才可擁有嘅嘢，再加上單鏡反光相機價錢日趨便宜、款色多、機身輕巧、操作又簡單，所以吸引女士購買，將相機放喺袋裏，去到邊，影到邊。

Caya：我鍾意拍攝人哋最自然流露嘅一面，所以特別鍾意喺街頭影snap shot，好似一班人等過馬路嘅表情。此外，我都會去街邊舖頭，好似中環石板街、旺角西洋菜南街，影低舖頭職員努力做生意嘅情況。其實，我拍攝內容係按當日心情而定，心情唔好會走去海邊影相，即使只係拍攝一位企喺海旁望海嘅人，都想影到啲離愁別緒嘅感覺。

Eunice：女士較男士細心，除了攝影，還會加入故事同文字，增強相片感染力。而女士一般都以感覺行先，而男士則較為講究技術，較留意相片構圖及光線布局等問題。

Caya：我第一輯相係講一對男女嘅曖昧關係，名為《男×女．純愛》。當時諗住影一個以愛情為主題嘅相集，就搵咗一對朋友扮曖昧男女，佢哋喺郊外玩，我就捕捉佢哋嘅神情。我將輯相上載到討論區，獲得唔少回響，因而認識咗一群攝影愛好者。為咗突破自己，有時會影fashion相，由自己設計model嘅造型，再配合化妝、場景，如果相片令人有feel，我就好有成功感。

Eunice：攝影不單是記錄影像，最重要是可以表達攝影者想法、心聲。年輕女性富創意，鍾意將新想法融合於攝影，又願意大膽嘗試，所以作品較為天馬行空，好有個人風格外，還洋溢本地特色。