政壇：搞搞政：張震遠訓警剛柔並濟

警隊執法不時惹嚟非議，遠嘅有暑假嘅8．18事件，近嘅有處理案件及涉及公眾訊息嘅資料發布等，都畀市民轟手法太強硬，尋日市建局主席張震遠出席警察結業典禮，並擔任結業操嘅檢閱官，佢致詞時籲班警察新丁要做到「剛柔並濟」，即係懲奸除惡要剛，對待市民或佢哋表達意見就要柔，白啲講即係唔係警棍鎮壓就得，仲要釋出善意、回應民意至得。張震遠講呢番話時，警隊一眾高層都在座，唔知佢哋有冇聽入耳呢？

被傳會擔任疑似特首候選人梁振英（CY）競選主任嘅張震遠，尋日出席有一百六十幾個警察畢業嘅活動，佢話現今市民嘅訴求同表達方式都趨向多元化，有啲仲會唔依常規添，所以警員要多啲耐性，而判斷能力亦要敏銳啲。佢仲話，警員「剛」時要以維護法紀同公眾安全做最高原則，仲要有絕不可退縮嘅底線，唔好畀任何人攪亂香港法規。同時亦要「柔」，就係要幫市民表達意見，皆因言論自由係香港核心價值，只要市民唔違法、唔影響他人，警員一律要全力協助咁話。

細聽佢嘅致詞，頗有回應近期事件嘅意思，期望警察新丁懂得唔可以一味強硬，應以柔和方法服務市民。