政壇：方剛豪捐五萬撐母校
自由黨立法會議員方剛、醫生佘達明有乜關係﹖佢哋都係華仁書院嘅校友，即係分屬師兄弟囉，港、九華仁書院師生校友等成立嘅「華仁一家基金會」準備參加明年二月舉行嘅馬拉松比賽，籌集一百萬元捐款，尋日方剛出席母校活動時，即捐五萬元以示支持。
方剛話，去年馬拉松都有落場跑吓，但跑步並唔係佢嘅專長，因為求學時期鍾意打籃球同游水，至今身形仲好fit嘅方剛又話，平時朱古力、雪糕、汽水都唔戒，但就對雞腳、豬皮等肥膩食品冇乜興趣。
「華仁一家基金會」主要資助港九華仁書院嘅小班教學、教師培訓及學生嘅全人發展，目標係籌夠一億元，依家已經籌到九千三百萬元，能否喺明年達標，就要靠一班名人校友全力支持喇。