政壇：經濟政策齋噏 教授點醒孖曾

財爺鬍鬚曾已經開始諮詢各界對新財政年度預算案嘅意見，由於呢份預算案由公布到煲呔曾執包袱只得四個多月，唔少人都睇死份預算案「超短視」。科大經濟系講座教授鄭國漢尋日喺一個電台節目中就提咗唔少意見，當中除講到政府經濟政策三宗罪、搞到香港中小企業升級喺亞洲三小龍中排最尾，仲話今次預算案係「最後機會」畀政府做嘢，煲呔曾同鬍鬚曾一錯再錯，會唔會珍惜呢個最後機會都好難講！

珠三角不歡迎港中小企

鄭國漢尋日出席電台節目時，就新一份預算案提出唔少意見，講到政府過去嘅經濟政策時，佢雖然語調溫和，但批評內容就好尖銳。綜合嚟講，佢認為政府嘅經濟政策有三宗罪，例如培育知識同技術為基礎嘅產業一向講多做少；港資中小企升級緩慢，已喺珠三角遭到不受歡迎嘅待遇，而政府一直都冇提供適時嘅幫助；跟住明知香港急需吸納國際人才，但香港嘅國際學校又唔足夠，搞到啲人才捨港而去，上述種種都間接影響香港嘅經濟轉型。

鄭國漢話：「（培育）知識同技術為基礎嘅產業，已經是香港的共識，但我們一向都是講的多、做的少。現在是政府多做一些的最後機會了。」佢口中嘅最後機會話畀邊個聽？煲呔曾就快執包袱，鬍鬚曾亦係任期內最後一份預算案，所以「最後一擊」適用於孖曾，至於佢哋會唔會趕尾班車、糾正過去嘅錯誤，真係要拭目以待。

除咗上述失誤，鄭國漢仲認為，香港應盡快開發新市場，應付未來嘅經濟挑戰；而港府已研究完畢嘅計劃同項目，就應喺呢一屆政府中開展，唔好等到下任政府，等收工嘅孖曾知唔知關心香港嘅人幾心急？