醫院溝通失敗 皆因庸官靠害

醫療事故沒完沒了，小病變大病，大病攞你命，連「焗死」病人咁恐怖嘅事都會發生，唔怪得公立醫院畀人叫做「鬼門關」咯。

話說有位患咽喉癌嘅七十三歲老翁喺伊利沙伯醫院進行切除喉部手術，六月底轉去九龍醫院康復治療。院方話唔使再插喉，改為由造口呼吸，情況一直穩定，點知家屬本月中突然接到醫院緊急通知，唔到一粒鐘後病人死亡。

死者家屬透露，病人過身前一周，已經發現造口紗布四邊被膠布密封，抖氣唔暢順，多次向護士反映都冇人理，懷疑病人因為紗布封喉未能成功咳痰，最終窒息致死。事件經本報揭發後，醫管局先至跪低，院方承認封紗布做法唔妥，向死者家屬致歉喎。

叮，淨係致歉有鬼用咩！正如病人權益組織話齋，今次事故涉事人員眾多，非常罕見，促請當局盡快交代死因。亦有立法會議員要求院方清楚解釋，點解咁多醫護人員都冇發現唔妥，家屬曾多次反映情況，一樣冇人跟進。

面對一大堆疑問，食物及衞生局局長周一嶽終於有回應，佢今次又點解畫呢？佢話喎，紗布表面有多個小孔，若病人因而唔能夠呼吸，應早已出事，所以真正死因需要研究；又話康復病房有廿幾名醫護人員，非常充裕，排除因為人手不足導致今次事故。

簡直九唔搭八。唔關紗布事，又唔關人手事，究竟關乜嘢事，唔通關病人事？你話嘞，病房咁多人做嘢，點解病人咳痰唔暢順冇人發現？周一嶽渾渾噩噩，但亦不得不承認，院方置死者兒子投訴不理，最後竟要死者家人喺垃圾桶搜證檢紗布，顯示醫院同病人家屬嘅溝通及互信完全失敗喎。

唉，公立醫院管理混亂，醜聞鑊鑊新鮮鑊鑊甘，呢啲都見怪不怪咯。呢，屯門醫院早幾日被踢爆打歪針導致早產嬰截肢；威爾斯親王醫院連「照燈」護理都搞到初生嬰兒斷腳骨……請問周一嶽，呢啲又關乜嘢事呢？

無論簡單手術定係普通康復護理，公立醫院統統都會出錯，病人輕則飽受折磨，重則性命不保，問你驚未！好心周一嶽唔好再渾渾噩噩啦，醫療醜聞無日無之，多到令人抖唔到氣，最失敗唔係醫院同病人家屬嘅溝通，而係閣下及醫管局嘅管理吖，叮！