SUN世代：網吧女僕誘商機

十七歲的小伙子，心口掛個「勇」字，認為網吧有得做就開網吧，開業三個月已回本，之後網吧開了一間又一間。十二年後，遇上最低工資政策，今次靠腦力，開設女僕為主題的網吧，殺出新血路，如今是坐擁二十間網吧的「網吧揸fit人」。這位膽識非凡的小子，便是陽光網絡公司董事楊智亮（Patrick）。

童年家貧，Patrick自幼已渴望賺大錢改善生活。小學五年級，他擁有人生首部電腦，電腦成為他童年最珍貴的「朋友」，他買書自學電腦知識，會考科科滑鐵盧，唯獨電腦科卻「坐火箭」。

因擅長電腦技術，為減輕父母負擔， Patrick為同學砌電腦及設計網站，賺取零用錢：「我唔想加重屋企經濟壓力，只好靠自己，一部電腦要成萬六蚊，我識得一啲舖頭，如果我幫同學仔砌機，一部有成三、四千蚊利潤！」

中學畢業後，堂兄見Patrick熟悉電腦，請他到電腦店打工，埋下Patrick開設網吧的伏線：「呢次係我第一次接觸網吧，了解當中嘅營運理念，我覺得呢門生意有得做！」當年十七歲的他，拿着爸爸打本的四十萬元，膽粗粗在青衣開設首間網吧，「當時因為年紀太細無人信你，壓力好大，加上爸爸賺錢好辛苦，我係不容有失，真係膽博膽！」

自信最後一個留喺網吧業

幸Patrick的網吧開業三個月已回本，未夠半年已開了兩間分店，逐步擴大網吧王國。但期間Patrick亦遇過不少困難：「我固執，認為自己啱晒，完全唔聽人意見，唔信我嘅員工，我就炒晒佢！」結果，二○○三年沙士，經濟蕭條，網吧生意陷入低潮，不停蝕錢。終於，他膽粗粗叫業主減租，員工又減薪，大搞噱頭，終於捱過逆境。

以為最艱難的日子已過，誰不知今年政府推行最低工資政策，再令Patrick陷入困局：「員工人工加一半，成個經營成本大增三分之一！」為了維生，他繼續發揮其膽識及「腦」力，靈機一觸開設女僕為主題的網吧：「呢個係全港第一間同埋最大嘅女僕網吧！」惟意念太新，未得到團隊信服，還經常受質疑，最後他真的請到大批女僕輔助：「只要有成果，就會有人相信！結果令全部同事都信服！」

這位「網吧揸fit人」僅二十九歲，他堅信只要肯努力、肯博，一定有回報！面對網吧巿場激烈競爭，他充滿信心地說：「我有膽、有創意，相信自己係最後一個可以喺呢行留低嘅人，我個『女僕館』咁有爆炸性，一定能幫我喺劣勢殺出一條血路！」

Patrick's Profile

現職：陽光網絡公司董事

公職：香港漳浦同鄉會副理事長、香港漳浦同鄉會青委會常務副主任

興趣：旅行、交友、電腦

獎項：「全港青年技能大賽」冠軍