政壇：CY葉劉同出席教育論壇

疑似特首候選人CY梁振英將於本周日下晝喺灣仔會展舊翼宣布參選，同時更多梁營助選人員亦陸續曝光，據聞人稱「麥Sir」嘅政府新聞處前助理處長麥國華，將加入梁營主責同傳媒溝通工作。眾所周知，麥Sir退休前同各大傳媒關係良好，亦熟悉傳媒運作，相信有助CY將治港理念順利傳遞開去。

另一名疑似特首候選人唐唐過去兩日都冇公開活動，而已自動當選金融界選委嘅滙豐亞太區行政總裁王冬勝，突然開腔表態支持唐唐做下屆特首。原來佢曾多次同唐唐談及香港金融發展，覺得唐唐嘅策略比較清晰，有利香港長遠發展喎。

講番CY，尋日同新民黨主席葉劉淑儀一齊出席專上教育政策評議會嘅教育論壇，CY被問到佢嘅理念係咪得到商界認同時，佢話自己喺商界有好多支持者，會繼續爭取各界支持。正慎重考慮參選嘅葉劉則首次透露會循序漸進準備參選工作，至今已有十日時間出席論壇同接觸選民喎！