泛民主派除咗白鴿黨主席鐵頭仁外，民協立法會議員KK馮檢基亦心思思想選特首。佢喺早前嘅區議會選舉舊患復發，搞到隻右手膊頭凸咗一舊嘢出嚟，未選特首先變「凸手」，都唔知係當黑定係好兆頭。
KK三年前跣低跌親隻右手，之後一直痠痠痛，骨醫、針灸、跌打、推拿都試過，先後睇咗十四個醫生都搞唔掂，喺區選中戰勝工聯會對手後落區謝票時，更發現膊頭有舊嘢凸起咗，起初仲以為生癌，後來睇骨醫至知係整親舊患，嚟緊兩個月都要戴住個手托，連夾餸、沖涼都要太太幫忙，佢話從來未試過有咁優厚嘅待遇。
KK喺區選中畀工聯會對手間接整傷舊患，喺立法會向工聯會議員葉偉明埋怨。
