政壇：大舊開新立會先例

自從立法會搬咗去新大樓之後，無論議員、官員、傳媒或者市民，幾乎每一樣嘢都要重新適應。人民力量立法會議員「大舊」陳偉業尋日見議事廳內法定人數不足，要求響鐘召人返嚟，成為新大樓嘅第一次。

兩舊立會保安回巢

喺舊大樓年代，唔少議員唔想坐喺議事廳，會縮番入去前廳抖吓，依家就多數直接上番去辦公室做嘢，以免浪費寶貴時間。尋日辯論緊調高強積金供款最高入息水平時，大舊突然舉手要求響鐘，於是唔少返咗上辦公室嘅議員惟有死死地氣走番落樓，場面就好似動物大遷徙咁，十分壯觀。

唔少議員蒲一蒲頭後，又再返番上辦公室。工聯會潘佩璆話，好彩不足法定人數嘅鐘響足十五分鐘，所以佢都唔使趕頭趕命仆落樓，佢仲思疑大舊之所以響鐘，無非係想其他議員落樓聽大舊講嘢，但實情唔少議員喺辦公室都有聽會議，大舊根本冇必要咁做。言下之意，大舊打鑼咁叫人返嚟聽佢講嘢，根本係累街坊！

話時話，近排喺新大樓見番兩個舊面孔，就係喺舊大樓時期經已服務咗立法會十幾年嘅舊保安嘞。原來佢哋回巢係為咗壓場，因為對立法會嘅運作瞭如指掌，無論掟嘢、衝擊、掃枱、包圍立法會等，都應付自如。今次專登搵佢哋返嚟，正正係借助佢兩個嘅經驗，教導一下人數眾多嘅新保安。照咁睇，新大樓唔單止硬件未掂，原來軟件都未掂。