政壇：莊偉茵一身紫色確旺財
尋日沙田馬場舉行國泰航空馬會短途錦標賽，國泰航空公司企業事務董事Quince莊偉茵同老公一齊嚟撐場。見Quince一身紫色打扮，由套裝裙、眼影、戒指到指甲油，清一色都係紫色，連老公件恤衫都係紫色，唔通佢想催旺財運，贏到發紫？
Quince套衫係真絲質地，喺北京街舖買嘅。佢話好支持國貨，因為國貨價錢平、質料好，最緊要唔會同人撞衫。講起時裝店H&M同意大利品牌Versace合作推出咗限量衣飾，香港排晒長龍，佢當日身處巴黎，見到當地一樣排大隊。所以話，排隊文化唔係香港獨有，原來連西方都一樣。
咁啱得咁蹺，國泰錦標賽跑出嘅「小橋流水」騎師巫斯義件衫都係紫色，Quince話自己買位置中咗，睇嚟紫色真係當旺喎！
莊偉茵（前右）同騎師巫斯義（前左）都係着紫色衫，證明紫色旺財。