政壇：阿王領工聯會空降港島
首次打正旗號參加區議會選舉嘅工聯會取得驕人佳績，據聞佢哋決定「肥水不流外人田」，由新界西立法會議員王國興領軍空降衝擊港島區，藉以擴大工聯會嘅政治版圖。
其實，阿王以前係東區區議員，後來轉戰新界西，今次返轉頭去港島區為工聯會卡位，備受內外夾擊嘅建仔形勢最危急，因為建仔本來就想攞兩席，但依家由邊個領軍爭奪第二席仍然十五十六，佢哋嘅副主席張國鈞同東區地膽鍾樹根都各有擁躉，加上同部分票源重疊嘅阿王短兵相接，港島區選情未許樂觀。
除咗建仔首當其衝之外，成立不足一年嘅新民黨亦蠢蠢欲動，希望「坐一望二」。之但係泛民主派同建制派喺港島區一直有「六四黃金比律」，建制派頂多攞到三席，但建制派各大黨派都擺出捨我其誰嘅格局，再係咁樣爭持不下，分分鐘會再次益咗泛民，到時班建制派真係喊都無謂囉。