政壇：搞搞政：人民力量衝擊選委票站

只有一千二百名選委投票選出特首，但反建制嘅人民力量嘅黃毓民同「大舊」陳偉業都有份參與，因為佢哋以立法會議員身份屬於當然選委，有得投票，但佢哋講明唔會提名任何人，亦唔會投票，反而會以選委身份衝擊票站，以凸顯制度嘅荒謬。毓民仲話會邀請白鴿黨劉慧卿一齊衝擊，只怕卿姐覺得「太暴力」而拒絕喎！

人民力量尋日舉行集思會，主席劉嘉鴻喺會後話議席得失唔緊要，最重要係畀選民有個選擇，所以唔需要更改人民力量路線。毓民亦講到明，話明年立法會同特首選舉，人民力量一定有搞作，好似特首選舉，就會同大舊入去抗議，又會當眾質問候選人；到立法會選舉，更會喺超級議席發動投白票運動，希望市民以選票反對呢個變相功能組別。

雖然佢哋喺區選大敗，但毓民話喺區選後冇搞籌款，但已收到二十幾萬元捐款，而且唔係單一捐贈，係好多支持者一齊捐助嘅，證明佢哋嘅吸水力仍然高企。