政壇：鬍鬚曾點《數字歌》唱好預算案

鬍鬚曾做財爺多年淨係識整色整水，預算案年年都畀人狠批到體無完膚，舊年仲破天荒發表史上最廢嘅預算案，普遍市民都期盼喺外圍經濟風雨飄搖下，佢今次可以還原基本步，做番份為市民福祉着想嘅預算案，但可惜佢嘅自我反省能力有限，淨係識用晒啲心機搞花臣，最新諗頭係搵咗縱橫歌壇二十載嘅實力派歌手林子祥同其他人合唱嘅《數字歌》助拳。

《男兒當自強》更fit

佢尋日喺個人網誌預告話，由今日開始大家可能不時會聽到《數字歌》呢首耳熟能詳嘅歌曲，一方面為本年度預算諮詢工作掀起序幕，亦象徵明年二月一號發表嘅任內最後一份預算案進入倒數階段喎。

其實，佢揀咗首傳頌多時嘅《數字歌》日播夜播本來都無可厚非，但錯就錯在首歌除咗一大堆數字天花亂墜之外，根本同預算案冇乜關連，搞到成個諮詢工作又再失去焦點。咁應該揀乜歌至啱呢？答案係同樣係由林子祥唱，而且陽剛味較重嘅《男兒當自強》嘞，因為呢首歌既可以為等收工嘅夕陽政府打打氣，同時可以勉勵鬍鬚曾最後一次做預算案唔好hea做，一舉兩得之餘又饒有意思。

話時話，鬍鬚曾之前藉預算案諮詢嘥公帑大搞個人形象工程都畀議員鬧爆，好似有一年佢喺預算案嘅電視宣傳短片中粉墨登場，當聽到有預算案嘅意見時，就忽然間好似攝青鬼咁攝出嚟聽大家嘅意見，既嚇親人又教壞細路，奉勸佢與其花心思搞埋啲唔等使嘅嘢，不如實事求是戙高床板諗吓，點樣可以紓緩市民面對通脹之苦，同埋點樣協助中小企應對風雨飄搖嘅外圍環境好過啦！