求學變求死 教育真失敗

俗語話，讀書唔成三大害。邊三害？自己冇文化，嘥咗父母血汗錢，仲變成社會負累添。香港幾怪都有，讀書唔成唔只三大害，仲可能走上絕路，連小學生都郁吓就要生要死，求學變求死，咁嘅教育認真失敗。

呢嗱，早排有位小五學生喺屋企跳樓自殺，佢仲喺日記簿寫上「好想死」，懷疑不堪功課壓力而走上絕路。查實，新學年以來本港已經有多名學童墮樓死亡，顯示學生求死絕非單獨事件。正如一項調查指出，百分之三小四至小六學生曾經有過自殺念頭，問你怕未。

細細個就話生無可戀，要生要死，而且情況愈來愈普遍，真係令人莫名其妙，點解會搞成咁？調查機構話，壓力主要來自功課同人際關係。教育界人士就認為，學生自殺成因複雜，唔可以淨係歸咎學校畀太多壓力。好簡單，現時全港只有大約一成八適齡學生可以升讀大學，前路愈來愈窄，壓力愈來愈大。

其實一句講晒，學生壓力大，皆因教育出咗問題。返學只為做功課、默書、測驗同考試，學生根本唔知為乜讀書。加上教育改革添煩添亂，母語教學、語文基準試、通識教育、三三四學制，一時一樣，搞到教師同家長無所適從，根本就係搵學生做白老鼠，叮！

呢，啱啱公布嘅中學文憑試模擬試成績顯示，通識科普遍存在作答鬆散，言之無物，唔少考生答非所問，離題萬丈。早幾日考評局公布全港性系統評估報告，亦顯示中小學生語文水平普遍倒退。唉，教改推行十幾年，愈改愈亂，愈改成績愈差，直頭就係靠害。

當局成日話「求學唔係求分數」，事實啱啱相反，教育資源投放不足，大學學位長期供不應求，求學唔求分數，點樣升讀大學吖？呢，今年高級程度會考，成績符合升大學最低資格嘅有近一萬九千人，創近十四年新高，但本港大學學位只得約一萬二千個咁大把，有七千人大學夢碎。

學位僧多粥少，莘莘學子為入大學爭到頭崩額裂，莫講話成績差，就算夠晒分都未必可以讀到大學，十年寒窗苦讀，隨時得個吉，壓力唔大至奇。條條大路通羅馬，變咗條條都係死路，唔該港府高官咪再講風涼話喇！

有人將望子成龍嘅父母形容為「怪獸家長」，其實計太一叮話齋，本港教育七國咁亂，唔單止剝奪咗學生嘅童真，仲剝奪埋佢哋嘅希望，呢個係「怪獸政府」就真，叮！