CULTURE噏：90後政新人 立志做特首

這次我們找來90後青年、立志成為特首的李佳斌，分享他的政治熱情。

剛過去的區議會選舉，投票率創下近年選舉新高，顯示港人對政治關注程度有所提升。事實上，很多未滿十八歲、未能在選舉投票的90後，都是非常熱衷政治及社會議題。中文大學政治與行政學系高級導師蔡子強指出，愈來愈多青少年關心社會事務，對香港社會及民主發展均有莫大益處。

李：由小至今，我對中、外歷史好有興趣，經常睇歷史書，分析當時軍事、政治形勢，到再大啲，開始留意本地政治及社會議題。

蔡：近幾年，明顯多咗年輕人關心本港民生同政治議題，例如近期不同政治團體舉辦集會同遊行，或者社會運動，都會發現愈來愈多80後，甚至90後參與。另外，亦都有好多年輕人，雖然無參加政治活動，但都留意時事，並且於網上或其他途徑就不同議題發聲。

李：香港有好多問題，如貧富懸殊、低下層生活缺乏保障、年輕人無力置業。其實，每個問題背後都有好多原因，所以我閒時會去圖書館睇書，或上網搜尋資料，研究問題癥結。近呢兩年，仲參加超過三十個由不同大學所舉辦、有關各個社會議題嘅講座或論壇，一方面可以聽吓學者意見，又可以同佢哋交流。我每日最少睇三份報紙，希望可以從多角度了解同一件事。另外，我好鍾意閱讀評論文章，仲會抄低一些有啟發性，或發人深省嘅作品，日後再睇。

蔡：多咗90後關心政治，同新學制加入通識科目有一定關係，因為通識課堂提供平台，畀學生接觸及討論唔同民生議題，培養對政治嘅興趣。我近期都收到好多由中學生send嚟嘅e-mail，希望討論社會議題。

李：我立志成為特首，盡我所能解決社會各樣問題。我定咗詳細計劃，首先努力讀書考入大學嘅社會科學或政治學科，之後希望有機會去外國進修，考察當地民生同政府運作模式，然後返港做公務員，希望一步步上，最終成為特首！

蔡：愈來愈多年輕人對政治感興趣，對香港社會絕對係有莫大嘅好處。首先，可以為政府、各個政黨培育新血，將來成為接班人；更重要一點是，一個成熟民主體制，一定要有一班關心政治嘅選民，呢班年輕人正正就係香港邁向民主社會嘅重要基石。