政壇：范太葉太鬥幫港人內地妻
新民黨立法會議員葉劉淑儀同全國人大常委范徐麗泰喺中學時不但係師姐妹，依家喺政界仲成日聚頭，尋日又齊齊出席同一論壇，聽到一宗求助個案時，仲各自出招，好似爭住幫人咁。
論壇上，有港人內地妻子大呻，話自從○三年結婚以來一直攞唔到單程證，次次想攞一年多簽就慘變人球，搞到個仔成日要陪佢中港兩邊走，講講吓忍唔住哽咽。范太一聽即刻話會積極跟進，仲畀咗個電話呢位太太添，嗌佢可以打去搵佢。葉太都不甘示弱：「你可以搵我，除咗范太之外，仲可以搵新民黨，咁啱我個助理就坐喺你前面，你可以問佢攞卡片！」葉太話自己中一時已經畀當時身為Prefect（風紀）嘅范太「指導」，當聽到范太希望佢慎重考慮參選特首時，葉太就好乖巧咁答：「多謝師姐鼓勵同指導。」真係姊妹情深到你唔信！