政壇：消防知衰迎新宴唔鋪張
消防處前處長盧振雄退位前連串退休騷，畀前線人員怒插浪費公帑。話口未完，消防又畀人篤，我哋日前收到「鬼信」，話消防前晚喺沙田馬會會所，為新任處長陳楚鑫舉行迎新盛宴。
消防處發言人前晚透過政府新聞處否認其事，話歡迎晚宴每逢有新處長上任都會搞，出席嘅都係自己人，當中只有少數係其他嘉賓，仲話晚宴係同事間夾錢搞，並無用到公帑咁話。記者前晚深入虎穴直擊晚宴實況，兩、三百個出席消防屬員個個身穿白色消防禮服到場，非常隆重。不過，再冇見到有前線人員畀人老點去做接待工作。新人事新作風，莫非鑫Sir銳意改走晒部門陋習？
消防前晚喺沙田馬場會所為新一哥陳楚鑫搞歡迎晚宴，相當旺場。