政壇：煲呔曾添煩添亂

港府處理對台關係一直後知後覺，近期關係略有解凍，煲呔曾就想趁機抽水。希望搶住喺執包袱前訪問台灣，成為訪台第一人。不過，佢嘅狂想曲似乎好大機會碰壁收場。據聞，內地同港台三方都對煲呔曾嘅訪台日子諗到頭都大晒，度唔到期兼分分鐘難產，因台灣就快舉行總統大選，跟住有立法委員改選，如果明年民進黨上台，煲呔曾更加有排都唔使去。天時、地利、人和乜都冇，煲呔曾今次真係攞嚟衰兼添煩添亂。

台灣選戰期難成行

煲呔曾四十二年前結婚去台灣度蜜月，據講對台灣有啲情意結。七十年代，佢喺亞洲開發銀行做嘢最後一次踏足台灣後，就再冇去過。最近我哋收到可靠消息，話煲呔曾訪台已進入具體安排行程階段，台灣行政院長吳敦義亦已批示陸委會規劃細節。不過，煲呔曾嘅夕陽政府只剩七個幾月時間，成行嘅話最多談風花雪月，好難掂到港台關係深層次嘅喇！

須知依家台灣選戰正酣，香港特首由小圈子選舉產生兼由北京操控，經常成為台灣民進黨攻擊國民黨候選人嘅彈藥，加上煲呔曾政治超低班，去到政治高手雲集嘅台灣實被人玩殘，相信喺明年一月十四日投票之前，中央唔會批准煲呔曾訪台。就算佢唔知醜任人玩，台灣國民黨政府都唔想招呼佢。

而明年二月香港又有預算案、三月北京會開全國人大及政協會議，同期仲有香港特首選舉，更重要嘅係，一旦民進黨重新上台，島內政治氣氛同兩岸關係都會有變化，煲呔曾隨時唔使去。不過，也有講法台灣現屆政府去到明年五月二十日先至正式卸任，扣埋大約一個月嘅政權交接期，煲呔曾都可以塞喺四月過去，反正都係添煩添亂啫！