核魔兵臨城下 把關不得偷懶

核魔出沒注意！日本大地震發生大半年，核輻射威脅並冇隨住時光遠去，而係愈來愈近。港府如果吊吊揈不設防，核魔隨時攻陷城池，到時喊都無謂。

唔係危言聳聽o架，嗱，日本核災難源頭福島第一核電站附近出產嘅大米，被驗出銫含量超出安全標準接近三成，日本當局焗住禁制當地大米付運。而環保組織早排抽查咗東北至關東地區多間超市嘅海鮮同加工食品，超過三成被驗出含微量銫，其中北海道鱈魚含量最高。

最攞命就係，日本氣象專家嘅模擬實驗結果發現，福島核災難已造成歷來最嚴重嘅海洋污染，擴散到大氣中嘅放射性物質正橫跨太平洋，大約每十日就環繞地球一周。即係話，全球幾乎冇一個角落可以幸免於難，核污染無處不在。

唔少港人對日本料理情有獨鍾，愈來愈多日本食物受到核輻射污染，中招唔係冇可能。咪以為太一叮杞人憂天呀，受核輻射污染嘅日本農產品，極有可能已經喺本港市面出售喇。

原來目前本港只禁止福島等五個縣生產或收割嘅食物輸港，但日本、美國同挪威專家聯手調查發現，岩手、宮城、山形及新潟等多個縣嘅土壤已經受到銫137污染。而本港食物安全中心嘅禁入口名單，自從日本爆發核災以來大半年都未更新過，即係話，受核輻射污染嘅農產品可能變咗漏網之魚流入本港，畀港人食咗落肚。食安中心做嘢敷衍塞責，求求其其，咁把關法同中門大開有乜分別？

呢，本港舊年七月起實施營養標籤制度，預先包裝食物必須清楚顯示能量及七種核心營養素含量。食安中心話檢查咗一萬六千幾款食物，合格率高達百分之九十九點三喎。點知審計報告踢爆食安中心弄虛作假，原來佢哋抽查嘅樣本，大部分來自安全風險較低嘅大型連鎖超市，而唔係問題食物比較集中嘅街市同小商舖。

話時話，本港日式食品好多都係小型食肆同商舖直接入口，如果食安中心繼續偷懶唔好好把關，淨係抽查超市就算數，口岸檢查又得過且過，防線形同虛設，日本輻射食物照樣可以長驅直入嘅咋。嗱，福島壽司配北海道鱈魚扒「銫香味定食」，搞出人命邊個負責呀，叮！