政壇：搞搞政：擦鞋騷遲到林公公失禮
煲呔曾搵民望偏低嘅林公公做政務司司長惹起極大爭議，估唔到送上門、畀晒機會佢去擦鞋都遲到。
話說林公公被安排喺出席社聯周年大會後，同近二百個會員分享福利政策嘅心得，而且演說內容係大讚社聯嘅。為咗隆重其事，社聯快快手準時喺搭正四點鐘開完大會，連社聯執行委員會主席廖達賢都話：「今次time management（時間管理）真係好嘞！」
點知好衰唔衰，林公公管理唔好時間呢，竟然遲到！可能佢都知衰，上台致辭就即刻冧班社聯會員，大聲朗讀：「你哋，已經成為咗香港非常重要嘅元素！」之後仲好骨痹咁大讚社聯話雖然政府未必樣樣都可以做到，但前線社工每日都喺度為香港把脈，可以提供到一啲政府提供唔到嘅服務，仲話既然大家都係政府嘅夥伴，鼓勵大家繼續無私奉獻喎！
