政壇：吳秋北揪輸病魔入院
雖然工聯會理事長吳秋北別號叫「吳揪得」，但一向都好勤力做嘢，啱啱統籌完區議會選舉，跟住仲要負責埋呢兩個禮拜喺黃大仙同屯門舉行嘅特惠購物周，唔知係咪操勞得滯，吳秋北真係如佢外號揪唔贏病魔，尋日突然急病入院，仲要留院觀察添！
吳秋北尋日原先要出席下晝最低工資委員會搞嘅諮詢會，但開會前佢突然發現身體有啲唔妥，於是去醫院睇病，醫生勸喻佢留院一至兩日，搞到工聯會要臨時取消出席諮詢會。
工聯會議員潘佩璆話早兩日先見過吳秋北，當時仲覺得佢好生猛，點都冇諗過佢過兩日就要入院留醫，話希望佢可以快啲好番，盡快重返工作崗位喎。
吳秋北尋日突然有急病入院留醫，連最緊要嘅最低工資諮詢會都要缺席。（資料圖片）