管水唔惜水 公帑水長流

慳家模範原來係洗腳唔抹腳嘅大花筒，前排同房署跨部門合作節約用水，爆冷攞咗個「公務員優質服務獎」嘅水務署，被踢爆管水唔惜水，每年浪費大量公帑。盛名之下，九唔搭八。

審計署幫水務署埋單，唔計猶自可，一計把幾火。本港舊年因為有人偷水，水費少收八千萬元，另外水錶唔準又導致損失八千萬元，兩樣加埋，庫房進帳少咗一億六千萬元。水務署舊年至因為水管滲漏，浪費食水被狠批，今年又衰多鑊，唔怪得畀人叫「水皮服務署」咯。

水錶失靈等於庫房漏水，審計署發現，全港近二百八十萬個水錶，超過十二年使用年限嘅竟然有十六萬個，而大型水錶過期未換嘅更佔三分之一。大型水錶涉及嘅水費佔整體數字將近三成五，但水務署居然測都懶測，唔怪得庫房年年蝕水咯，叮！

水錶失靈話之你，就算偷水證據確鑿，水務署一樣懶懶閒，搞到偷水賊愈來愈猖狂。呢，食環署轄下七個街市，○八到一○年共有廿五宗偷水個案，有啲更多次犯案添，但水務署居然一無所知。淨係呢樣，都知水務署有冇做好自己份工啦，叮！

唉，水務署係就係管水，弊在管理甩甩漏漏，水到唔水嗰隻呢。多年來失職醜聞未停過，遠嘅唔講，兩個月前申訴專員就踢爆水務署敷衍塞責，烏龍百出，抄錶流程欠缺監察、抄錶員培訓不足、測試水錶方法欠妥，又懶理壞錶失準。

好似灣仔一幢大廈嘅公用地方咁，水錶三年都錄得零記錄，法團某日突然收到二萬五千蚊嘅巨額帳單，嚇到幾乎暈低。原來抄錶員最初六次都係零紀錄，水錶好明顯出咗問題，但佢一於少理，拖咗成年至換水錶，之後又靠估發水費單，結果咪擺出大烏龍囉。

申訴專員上次已經提及全港有十幾萬個水錶可能唔準，點知水務署左耳入右耳出，既冇重視問題，更加冇採取補救措施。呢次又輪到審計署開炮，睇吓又可唔可以轟醒水務署呢班冥頑不靈嘅官老爺。

水管老化冇人理，水錶失靈話之你，太一叮想問下水務署署長馬利德，如果呢啲失魂水錶同老爺水管裝喺你屋企，仲會唔會咁滋油淡定，關人個關吖啦？叮！