政壇：政商定格：鄭家恒馬家慧 膺青年工業家

「傑出工業家獎」尋日出爐，由從事玩具業四十年嘅鎮泰有限公司董事長黃鐵城獲獎，而「青年工業家獎」四位得獎者同日誕生，包括有「聖誕樹王子」之稱嘅Lewis鄭家恒同「紙品公主」Rebecca馬家慧。

黃鐵城係現任中國玩具協會名譽會長，回想當年，原來佢想做公務員，想話趁早養家，後來獲助學金入讀工專，改寫人生。如今事業有成，佢話全靠太太四十年嚟風雨同路。

年僅三十五歲嘅Lewis係史丹福大學工商管理系高材生，現任保利高集團行政總裁。佢自爆爺爺做膠花起家，到爸爸嗰代生產聖誕樹，現時係全球聖誕樹製造商龍頭，得獎實至名歸。至於只有三十二歲嘅Rebecca，係唯一得獎女性。佢現任力嘉集團（中國）總經理，為唔少家電品牌生產紙品。留學澳洲嘅佢，十年前返中國打理紙品廠時，因為唔識「煲冬瓜」，一度蝦碌百出。