工聯會副會長陳婉嫻早年曾患上乳癌，退下立法會火線冇耐，就重出江湖參加黃大仙區議會選舉，仲做埋票后添！嫻姐尋日話班街坊好關心佢嘅健康狀況，仲叫佢早啲返屋企瞓覺。但班街坊有所不知，原來嫻姐已奉行「科學管理」方法照顧身體。
現年六十幾歲嘅嫻姐話，所謂「科學管理」照顧身體，簡而言之主要係醫生叫佢注意四件事，第一要有足夠睡眠，其次係適當運動，仲要有良好飲食，最後係做好情緒管理。佢笑言頭三樣嘢都做到，反而情緒管理就做得唔係幾好，所以希望第時可以「適當地鬧人」喎。
嫻姐尋日帶埋喺區選勝出嘅「小花」劉桂容出嚟見傳媒，睇嚟阿容呢期得寵噃！
