政壇：搞搞政：蘇菲漏報利益被勸退

有市民喺四月底、五月初向立法會投訴，指議員「蘇菲」梁劉柔芬、霍震霆、經濟動力梁君彥、「金勞詹」詹培忠、黃宜弘同建仔葉國謙漏報董事利益。立法會議員個人利益監察委員會查咗成半年，尋日發表報告，除查明葉國謙唔算漏報外，針對其餘五位議員嘅投訴全部成立，但竟唔作處分！

議監會副主席劉慧卿話五個議員既非蓄意漏報，亦冇證據顯示佢哋違規同議員角色有利益衝突，所以唔作處分，純粹大聲鬧吓佢哋「有欠謹慎」、「不符合公眾對立法會議員嘅合理期望」，將來要加倍小心，唔能夠將申報嘅責任推晒畀助理了事，而身為議監會主席嘅蘇菲「理應更為警覺」。

身為議監會委員嘅黃成智就略帶激動咁話，議員申報求求其其、錯漏百出，難以令市民信服，尤其係蘇菲，佢有份查完前排經濟動力劉皇發漏報利益，轉個頭自己又犯同樣錯誤，令人質疑佢仲適唔適合做主席，所以佢會去信蘇菲，勸對方做番委員；蘇菲就話交番畀委員會決定。睇嚟，蘇菲主席個位都未必坐得穩喎！