政壇：鬆綁fb選舉廣告 譚志源跪低

區議會選舉曲終人散，候選人都係時候整理多月嚟嘅選舉廣告，以備交畀選舉管理委員會備案。選管會前排就選舉廣告嘅規管畀人鬧到體無完膚，早幾日佢哋終於肯跪低，就規管選舉廣告作出新安排。

愈管愈亂 每日上報幾次

話說選管會主席馮驊早前喺區選候選人簡介會上話，如果候選人留言或者畀like佢嗰啲粉絲，就要交番個書面文本畀選管會。候選人仲要喺網站上列明，如果粉絲們like或留言畀佢哋，等於書面同意佢哋將呢啲like或留言公諸於世。呢個政策一出，好多候選人狂轟選管會愈管愈亂，咁搞法可能每日要上報幾次。

政制及內地事務局尋日向立法會呈交「選舉廣告規管事宜檢討」文件，放寬上呈選舉廣告嘅準則，列明如果候選人之前用過電子方式展示選舉廣告，佢哋可以選擇喺選舉報告發布後嘅一個工作天之內，將佢嘅選舉報告張貼喺一個由佢負責嘅選舉網站上畀公眾查閱，咁就唔使向選舉主任遞交聲明書同文本。

另外，如果支持者出於自願支持候選人發表嘅選舉廣告，候選人就唔使事先取得支持者嘅書面同意。換句話講，如果支持者喺候選人嘅facebook入面畀like或留意見，候選人可以唔使向選管會交書面報告。

相信政制及內地事務局局長譚志源親身經歷過區選之後，發覺咁嘅規管法簡直係害人害己，盞招嚟unlike，所以先跪低修改啫！雖然係後知後覺，總好過不知不覺吖！